Лозарите и винарниците ги договорија цените на винското грозје

Откупувачите на грозје и лозарите постигнаа договор за минималната откупна цена на килограм винско грозје, соопшти Министерството за земјодлество.

Договорено е минималната цена за откуп на сортата грозје Вранец со 19 шеќерни единици да биде 13 денари за килограм. Покрај тоа, договорена е и цена од 0,68 денари по шеќерна единица, која ќе се користи при пресметка на откупна цена за сортата Вранец во случај кога производителите на грозје ќе предадат грозје со повисока или пониска вредност од 19 шеќерни единици.

Минимална цена, пак, за откуп на сортат Смедеревка со 17 шеќерни единици ќе биде 11 денари за килограми и 0,64 денари по шеќерна единица, која ќе се користи при пресметка на откупна цена во случај кога производителите ќе предадат грозје Смедеревка со повисока или пониска вредност од 17 шеќерни единици.

Цената на винското грозје од т.н. висококвалитетни сорти ќе го утврдуваат производителите на грозје и откупувачите и треба да биде повисока од онаа на Вранецот и Смедеревката.