Фотографија од татко кој ја загуби ќерката – симбол на трагедијата од земјотресот во Турција

Тоа беше момент кој ја сумира неискажливата болка од земјотресот во Турција – татко ја држи ќерката (15) за рака, единственото нешто што се гледа од нејзиното тело згмечено од бетон.

Месут Ханчер седеше сам на мразот на купот скршени тули што некогаш беа негов дом, несвесен за светот и обземен од тага.

Неговата ќерка Ирмак била мртва. Но, тој одбил да ја пушти, галејќи ги прстите што излегувале од душекот на кој спиела девојката кога во понеделникот се случил првиот потрес пред зори.

Немаше спасувачки екипи. Преживеаните очајнички се бореа низ урнатините со раце за да ги најдат своите најблиски. Рамките за кревети на искршените балкони, искинатата облека и играчките ја раскажуваат приказната за изгубените животи.

Беше предоцна за Ирмак, една од повеќе од 20.000 луѓе потврдени дека загинале во најсилниот земјотрес што ги погоди Турција и Сирија во речиси еден век.

Но, фотографот ветеран на АФП, Адем Алтан, кој побрза на местото на настанот од Анкара, не можеше да го тргне погледот од неподвижниот татко кој тагуваше во тишина.

Тој ја насочи камерата кон Ханчер од далечина од 60 метри. Тоа беше чувствителен момент. Но наместо да го избрка, таткото го поканил фотографот кај себе.

„Сними го моето дете“, му рече со низок растреперен глас.

Без зборови

Таткото сакаше светот да ја види неговата и тагата на неговата земја. И светот ја виде.

Фотографијата на АФП се појави на насловните страници на големите весници ширум светот, вклучувајќи ги Фајненшл Тајмс и Волстрит журнал.

„Додека снимав, постојано си повторував „колку е болка“. Не можев да се сопрам од плачење. Останав без зборови“, изјави Алтан.

Го прашал Ханчер како се вика и како се вика ќерка му.

„Тешко зборуваше, па не можев премногу да разговарам со него“, вели Алтан.

Алтан не можеше да поставува прашања. Тишината беше неопходна за да може да се слушне дали има преживеани под урнатините.

Фотограф 40 години, вклучително и 15 за АФП, Алтан знаеше дека оваа фотографија ја претставува турската болка.

Но, неговото глобално влијание го изненади. Споделена е стотици илјади пати на интернет.

Алтан доби илјадници пораки од луѓе ширум светот кои сакаат да ја понудат својата поддршка.

„Многумина ми кажаа дека никогаш нема да ја заборават оваа слика“, рече тој.

Извор: lokalno.mk