Гарантен фонд за земјоделците за полесен пристап до кредити

Се воспостави гарантниот фонд со кој земјоделците полесно ќе земаат кредити од комерцијалните банки. За да одобрат кредити банките бараат хипотека, но вредноста на површините и објектите со кои располагаат земјоделците и стопанствениците од руралните средини не се доволна гаранција. Со потпишаниот договор помеѓу земјава и УСАИД  се обезбедени средства со кои фондот ќе им гарнтира за 50 отсто од висината на земените кредити до 200 000 евра а над 500 000 евра 40 % од потребната гаранција за банката.

– Преку овој гарантен фонд земјоделците и корисниците на ИПАРД кои ќе побараат кредити од Комерцијална банка, Халк банка, Прокредит банка или Стопанска банка – Битола потребно е да достават обезбедување, односно гаранција само за 50 отсто од висината на побараниот кредит, додека останатите 50 проценти ќе ги гарантира овој фонд, рече министерот за земјоделство, шумарство и водостопанство Михаил Цветков по потпишувањето на договорот.

Меѓудругото министерот истакна дека се прават напори државата да субвенционира 50 % од каматите на земените кредити од страна на земјоделците. Каматите сега се движат од 4 до 8 отсто, а со субвенционирањето каматата би била од 2 до максимум 4 %.

Директорот на мисијата на УСАИД во Македонија истакна дека со овој гарантен механизам ќе се забрза развојот на земјоделството во земјава и ќе се обезбеди поголем просперитет на домаќинствата во руралните средини.

Тонско Џејмс Стајн Директор на мисијата на УСАИД во Македонија

Гарантниот фонд ќе функционира во наредните 10 години и преку него ќе се пласираат кредити во висина од 20 милиони долари.