Неуспешен обид за разбојништво во Гостивар, тројца и влегле дома но ја спасил алармот

Тројца маскирани разбојници синоќа се обиделе да ограбат семејство во нивниот дом во Гостивар во населбата „Седма зона“. Благодарение на присебноста на домаќинката, која повикала помош и го активирала алармот, намерата на разбојниците не се реализирала. Во куќата на семејството кое важи за поимотно и има менувачница, разбојниците влегле додека, внатре биле сопругата, мајката и синот на сопственикот. Обидот за разбојништво го потврди и сопственикот А. Ф. кој по телефон изјави дека неговата сопруга била удрена неколку пати по што и била пружена медицинска помош.

– Не е одземено ништо, но повреди имаат и мајка ми и синот. Сите се под голем стрес, изјави А.Ф.

Според него, разбојниците, од кои едниот имал пиштол, ја искористиле приликата кога жената ја отворила влезната врата и излегла да фрли отпадоци. Откако влегле, со примена на сила се обиделе да ги врзат со леплива трака и од домашните барале пари. Во мешаницата, домаќинката З. Ф. (61) успеала да го активира алармот, по што тројцата натрапници побегнале. Набрзо на помош дошле и соседите, а случајот бил пријавен во полиција по што бил извршен увид.