Стејт департмент: Србија вложува напори, но клучните проблеми во борбата против трговијата со луѓе остануваат

„Владата на Србија не ги исполнува целосно минималните стандарди за елиминирање на трговијата со луѓе, но вложува значителни напори во таа насока“, се наведува во новиот извештај на Стејт департментот за трговијата со луѓе во светот.

Во извештајот се бара целосна истрага за наводите за принудна работа во фабриката за гуми во кинеска сопственост во Зрењанин и во рудниците за бакар во Бор.

Стејт департментот наведува дека Србија напредувала во споредба со претходниот период на известување, па затоа се префрлила на „ниво 2“, а напредокот се одразува во осудата на поголем број трговци со луѓе и истрагите за владини службеници за кои се тврди дека се соучесници во злосторствата поврзани со трговијата со луѓе.

„Властите идентификуваа повеќе жртви, а Центарот за заштита на жртвите на трговија со луѓе (ЦПТВ) усвои нови стандардни оперативни процедури за идентификација, упатување и помош на жртвите на трговија со луѓе, што вклучуваше право на жртвите да се жалат на официјалните одлуки за идентификација“, се наведува во извештајот.

Според извештајот, властите издвоиле значително повеќе пари за ЦПТВ и за првпат се доделени средства на невладини организации за борба против трговијата со луѓе, кои обезбедуваат поддршка на жртвите.

Сепак, Владата на Србија не ги исполни минималните стандарди во неколку клучни области, бидејќи помалку лица одговорни за трговија со луѓе се гонети, се користат кривични дела со помали казни и недостасуваат проактивни напори за идентификување и соодветни процедури за скрининг на жртвите меѓу ранливите групи.

Не постои специјализирана поддршка за децата жртви на трговија со луѓе. Властите продолжија да ги казнуваат жртвите со затворски казни, условна казна и парични казни за нелегални дела извршени како директен резултат на трговијата со луѓе.

Во извештајот, владата во Србија беше критикувана и за тоа што не воспостави партнерство со граѓанското општество во напорите за заштита на жртвите.

„Додека ЦПТВ ги потврди и интервјуираше некои од жртвите во фабриката во кинеска сопственост, владата постигна мал напредок во отворената истрага во која беа вклучени стотици странски работници кои се соочија со услови на принудна работа во фабрика и рудник во кинеска сопственост“, се вели во извештајот на Стејт департментот.

Во препораките означени како приоритет, Стејт департментот повикува на енергична истрага и гонење на кривични дела поврзани со трговија со луѓе, вклучително и оние во кои се вклучени соучесници. Исто така, бара соодветни казни за осудените трговци со луѓе, кои треба да вклучуваат значителни затворски казни.

Апсолутно е неопходно, како што е нагласено, да се истражат наводите за принудна работа во фабриката за гуми во Зрењанин, во кинеска сопственост, и во рудниците за бакар во Бор, и да се обезбеди помош и заштита на работниците.

Властите во Србија се должни да соработуваат и со граѓанското општество во напорите за идентификување и заштита на жртвите, како и да обезбедат специјализирани услуги за поддршка на децата на жртвите. 

МИА