Кожув не му пушти на Куманово во БИБЛ лигата

На средбата одиграна попладнево во Гевгелија, во рамките од 17. коло на БИБЛ лигата кошаркарите на Кожув беа подобар противник од Куманово и се радуваа на победа со 104:86. Најзаслужни за триумфот на гевгелискиот клуб беа Миладин Пековиќ, кој постигна 20 поени, Славен Чуповиќ со 17 и Златко Гоцевски, кој придодаде 16 поени.

Овој натпревар немаше никакво значење за Кожув, а победа за Куманово ќе значеше пласман во следната рунда. Судбината на кумановци сега зависи од исходите на два натпревари. Тие најнапред ќе го исчекуваат резултатот од дуелот, кој е во тек, а се игра во Романија меѓу Крајова и Сигал Приштина. За нашиот тим да ги сочува шансите за шестото место, потребна е победа на косовската екипа, предводена од поранешниот селектор на Македонија, Марин Докузовски.

Потоа, ќе мора да го чекаат и исходот од натпреварот меѓу Балкан и Пеќ, закажан за 25 март, во кој кумановци ќе се надеваат и навиваат за победа на бугарската екипа. Само на тој начин екипата на Куманово ќе го освои шестото место, а со тоа ќе обезбеди пласман во разигрувањето односно четврт-финалната рунда.

Табела: Галил Гилбоа 26 бодови, Сигал Приштина 23, Левски 23, Теодо 23, Балкан 22, Куманово 22, Пеќ 21, Крајова 21 и Кожув 20.