Skip to content
Во екот на бербата на кратошијата, лозарите денот го започнаа со затворени пунктови. Никој не откупува грозје поради имплементацијата на измените на Законот за вино според кој една вага смее да откупува за само една винарија.
– Моментално на откупните пунктови е тензично и лозарите се револтирани, бидејќи и покрај ниската цена, никој не го сака грозјето, и тоа може да остане и скапе на лозјата и во приколиците на тракторите. Дополнително создаваат притисок и големиот број на инспектори кои се наоѓаат на откупните пунктови спремни да го казнат откупувачот ако го прекрши законот. Во незавидна положба се и лозарите и откупувачите кои претходно веќе имале склучено договори со производителите и се должни да го откупат грозјето. Хаосот е евидентен, на штета и на двете страни – изјави за Бриф, претседателот на СДСМ Кавадарци, Зоран Георгиев.
Лозарите својот револт поради состојбата во која се наоѓаат, освен кон Владата го насочуваат и кон нивниот претставник Љупчо Аризанов кого никаде го нема да помогне и реагира во овие клучни моменти за нив.
