Мерц: Самитот на НАТО во Анкара ќе пренесе порака за „сила и единство“

Германскиот канцелар Фридрих Мерц денеска изрази увереност дека самитот на НАТО, што денеска и утре ќе се одржи во Турција, ќе проектира „сила и единство“ во време на глобални тензии и конфликти, јави агенцијата Анадолија.

„Самитот на НАТО во Анкара се одржува во турбулентни времиња и во овие времиња ни е потребен силен и обединет НАТО како гарант на нашата слобода и безбедност“, изјави Мерц на аеродромот во Берлин пред да замине за настанот во турската престолнина Анкара.

Мерц рече дека европските сојузници се подготвени да преземат поголема одговорност во рамките на Алијансата, со зголемување на трошоците за одбрана и подобрување на воените капацитети, со што ќе се зајакне европскиот столб на НАТО.

Канцеларот рече дека во последните недели имал интензивни разговори со американскиот претседател Доналд Трамп, турскиот претседател Реџеп Таип Ердоган, други европски лидери и генералниот секретар на НАТО, Марк Руте, за да се обезбеди дека самитот ќе даде позитивни резултати.

„Се надевам дека, заедно, ќе успееме да го поттикнеме „Духот на Анкара“ на овој самит“, рече Мерц.

„Градиме поевропско НАТО за да може НАТО да остане трансатлантски. Тоа треба да биде пораката што ќе произлезе од овој самит.“

Тој додаде дека целта е да се постигне и посилна трансатлантска соработка и значително посилна европска одбранбена способност.

МИА