Skip to content
Надзорниот одбор на АД за пренос на електрична енергија и управување со електроенергетскиот систем, МЕПСО го именува Ненад Јовановски за претседател на Управниот одбор и генерален директор на Операторот на електропреносниот систем на Македонија, соопшти денеска АД МЕПСО.
Јовановски на позицијата генерален директор и претседател на УО го замени Синиша Спасов кој четири години управуваше со МЕПСО.
– Јовановски е дипломиран електроинженер со богато и долгогодишно работно искуство во подружницата Оператор на електропреносниот систем (ОЕПС) во рамки на МЕПСО, а од март годинава досега ја извршуваше функцијата заменик на генерален директор. Јовановски својата кариера во МЕПСО ја започна како оперативен водител во Националниот диспечерски центар (НДЦ). Јовановски работеше 12 години во НДЦ, организациска единица од круцијално значење за ОЕПС и за МЕПСО, од каде во реално време и во континуитет 24 часа секојдневно се управува македонскиот електроенергетски систем. Потоа во период од две години Јовановски беше ангажиран во процесите на организирање аукции за расположливи прекугранични капацитети и други процеси за оперативно планирање во ОЕПС. Кон крајот на јануари 2014 година беше именуван за директор на подружницата ОЕПС и за член на Управниот одбор на МЕПСО, се вели во соопштението од компанијата.
Во него се додава дека Јовановски е член на бордот на директори на SEE CAO, регионална компанија која организира аукции за закуп на расположливи прекугранични капацитети, а го претставува МЕПСО и во Комитетот за системски операции за управување со електропреносните системи на Европската асоцијација на електропреносни систем-оператори (ЕНТСО-Е).
На истата седница Надзорниот одбор ја именувал Елизабета Гиовска за заменик на генерален директор на МЕПСО. Гиовска е дипломиран машински инжинер со 12 годишно работно искуство во енергетиката од кои 10 години во МЕПСО, период во кој, како што посочуваат од компанијата, особено се истакнува нејзиниот досегашен професионален ангажман во Операторот на пазар на електрична енергија (ОПЕЕ), подружница во рамки на МЕПСО.
– Гиовска 10 години наназад активно е вклучена и даде значаен придонес во процесот на спроведување на реформите во сите досегашни фази од либерализација на пазарот на електрична енергија, кои се во делокругот на активности на МЕПСО преку подружницата ОПЕЕ. На функцијата заменик на генерален директор Гиовска доаѓа од позиција раководител на Одделот за организирање на пазарот на електрична енергија во рамки на подружницата ОПЕЕ, истакнуваат од МЕПСО.
