Skip to content
Повеќе од месец дена се врши вистинка хајка од страна на власта врз фирмата „ДАНИВО“ која е регистрирана за откуп и трговија со ориз. И покрај тоа што ги исполнува сите услови за извоз и сите потребни документи и анализи, сепак вечерва со наредба на Државниот земјоделски инспекторат, камионите со ориз за извоз во Србија, на граничниот премин Табановце, повторно се блокирани.
–Без никаква причина ми забранија да откупувам а сега ми ги држат камионите на граница. Во време кога ланскиот ориз сеуште не е продаден, а земјоделците немаат пари да си ја платат годинешната жетва, ние не можеме да откупуваме и извезуваме. Ова е на директна штета на оризопроизводителите – вели Ане Ефтимов сопственик на „ДАНИВО“.
Оризопроизводителите се едногласни кога станува збор за оваа фирма дека редовно го плаќа откупениот ориз.
-Неколку години оризот го носам кај Ане од „ДАНИВО“ и секогаш си стои на зборот, односно го почитува договорот за исплата на оризот. Неколку пати апелираме до владата да не ги затвора откупувачите бидејќи ние немаме каде да го носиме оризот – вели Стојанчо Божинов од Тракање.
Откупувачите и оризопроизводителите очекуваат дека сепак власта ќе ги преиспита своите постапки и ќе превземе мерки за решавање на проблематичниот откуп на ориз од кој зависат околу 6000 земјоделски семејства кои се занимаваат со ова производство.
