Вангелис: Тоа што е тешко за производство, тоа секогаш има добра цена

-На 18 хектари имаме насадено најмногу праски, потоа кајсии и круши. Се одлучивме за неколку вида на овошни култури поради сигурност во производството и пласманот, оти секоја година, зависно од родот, цените на одредени овошни производи е различна – вели Вангелис и додава дека негова предност е што има традиција во ова производство, а го следи пазарот и новитетите за да биде конкурентен.

-Сите култури имаат свои специфики на производство, но факт е дека најдобра цена секогаш има она што е потешко за производство. На пример крушата е поделикатна за производство но таа никогаш нема проблем со пласманот и секогаш држи добра цена. Ние главно пласираме на домашен пазар и за Русија – вели Вангелис.

На неговиот модерен насад посебно се внимава на кроењето на овошките и на заштитата. Има неколку начини, некои сеуште ги испробува, а за некои има докажани позитивни резултати, како ферохормоните за заштита од штетници. Но потенцира дека и кај нив проблемот во извршување на овие агротехнички мерки кои главно мораат рачно да се изведуваат, е немањето на работна сила. Најмногу од сезонските работници заминуваат за Германија и Италија.

-Една од новитетите кои ги користиме се и овие ферохормони кои рачно се закачуваат на секоја овошка. Нивното делување е преку систем на испуштање на миризба која ние не ја чувствуваме, го спречува размножувањето на инсектите. Овие ферохормони, ги добиваме како субвенција од ЕУ фондовите но мора да покажеме дека имаме резултат – изјави Вангелис.

Во врска со поддршката која ја имаат од државата и ЕУ фондовите, вели дека од државниот буџет не добива ништо, но затоа има мерки преку ЕУ фондови кои помагаат во подигнување на нови насади и други агротехнички мерки.

-Имам искористено 15 000 евра од програма на ЕУ, наменета за сите земјоделски производители, но предност имаат младите земјоделци, бидејќи Европската Унија посебно внимание покажува за нас помладите земјоделски производители оти се помалку сакаат да се занимаваат со земјоделско производство -вели овој млад овоштар кај кого беше евидентна љубовта кон агарот и желбата за успех.

Извор: Agrotim.mk]]>