Бислимовски: Потрошувачката на нафтените деривати е намалена за приближно 40 проценти

Ова е еден краток период, но според нашите комуникации што ги имаме пред се со компаниите кои што имаат малопродажба, бидејќи најмногу е погодена малопродажбата во овој момент, потрошувачката е намалена за приближно 40 проценти. Врз основа на оваа намалена потрошувачка од 40 проценти, намалени се и приходите во буџетот, истакна претседателот на РКЕ Марко Бислимовски во емисијата „Топ тема“.

„Приходите се намалени, некаде според тие анализи што ги слушаме, споредбено со истиот овој период од минатата година, за десетина до 15 милиони евра. Но исто така има и дополнително намалување поради драстичното намалување на цените и на бензините и на дизелот. Имаме сериозно намалување на цените. Не е тоа поради некое влијание на нашата држава или на регулаторната комисија за енергетика, едноставно такви беа случувањата на светските берзи. Значи какви ќе бидат случувањата на светски берзи, и кога расте и кога опаѓа цената на нафтата, ние тоа го ефектуираме во нашата методологија“, наведува Бислимовски.

Граѓаните да бидат сигурни, вели тој, дека нашата методологија е иста како методологиите што се применуваат во сите земји каде што се регулира нафтата, а такви се мал број на земји.

„Во сите останати земји во регионот, овој бизнис е целосно либерализиран. И од тие причини, кога ги анализираме цените на нафтените деривати во Македонија и во другите земји, многу е јасен заклучокот дека цената на нафтените деривати во нашата држава е убедливо најефтина“, рече претседателот на РКЕ.

]]>