Тајната на Конклавата: Што јадат кардиналите, како изгледа затворениoт избор за папа и зошто чадот е најважниот сигнал во светот

Светот се подготвува за историски момент – на 7 мај започнува конклавата, за време на која 133 кардинали ќе го изберат новиот поглавар на Римокатоличката црква. Белиот чад кој ќе се издигне над Систинската капела ќе го означи изборот на наследник на папата Франциск. Но, што всушност се случува зад затворените врати на Ватикан? Како изгледа секојдневниот живот на кардиналите додека донесуваат една од најважните одлуки во светот на верата?

Храна без луксуз, но со мерка: Како јадат кардиналите за време на конклавата

Исхраната за време на конклавата е внимателно осмислена – едноставна, но не и аскетска. Оброците ги подготвуваат калуѓерките и персоналот на ватиканскиот пансион Domus Sanctae Marthae. Менито содржи медитерански вкусови: супи, тестенини, лесно месо како пилешко, зеленчук и свежо овошје. Умерена количина вино со ручек или вечера е дозволена секојдневно, додека жестоките пијалоци се забранети. Во недела е дозволен и скромен десерт – обично торта или колач.

Санта Марта: Место на тишина, молитва и одлука

Кардиналите се сместени во резиденцијата Санта Марта, комплекс изграден токму за потребите на конклавата. Секоја соба е едноставна – со дрвен кревет, биро и мала бања. Комуникацијата со надворешниот свет е строго забранета: нема интернет, нема телевизија, нема телефон, дури ни весници. Сите контакти се прекинати за да се зачува доверливоста на процесот.

Систинската капела – свето место на избор

Во капелата се инсталираат гласачки места, аудио систем и две печки – едната традиционална, другата модерна – за горење на гласачките ливчиња. Сигналот што светот го очекува е чад: црната боја значи дека папата сè уште не е избран, додека белата значи дека изборите се одржале. Современата технологија гарантира јасна боја на чадот, а ѕвоната на базиликата „Свети Петар“ го потврдуваат конечниот момент.

Најстроги безбедносни мерки и целосна изолација

Швајцарската гарда се грижи за безбедноста: користи најсовремена опрема, блокирачи на сигналот и уреди против дронови. Прозорците се затемнети, инсталирани се детектори против прислушување, а секое движење на кардиналот се следи. Дури и персоналот што служи останува во изолација во текот на целиот процес.

Кои се кардиналите и како гласаат?

На конклавата учествуваат 133 кардинали од 71 земја. Најмладиот е Микола Бичок од Украина (45), а најстариот е Карлос Осоро Сиера од Шпанија (79). Повеќето кардинали се имнувани од папата Франциск. Гласањето се одвива двапати претпладне и двапати попладне секој ден, сè додека не се постигне двотретинско мнозинство. Во случај на болест, кардиналот може да гласа од својата соба со помош на „ infirmarija “.

Традиција, молитва и тивка политика

Иако изборот на папа е длабоко духовен чин, неформалните разговори пред конклавата, па дури и вечерите во римските ресторани, имаат своја улога. Италијанските кардинали се надеваат дека е дојден моментот за враќање на италијанскиот папа, а меѓу имињата што се издвојуваат се Пјетро Паролин, Матео Зупи и Пјербатиста Пикабала.

Интересни факти: Чад, гласање и скромно секојдневие

Белиот чад се произведува со помош на хемикалии кои горат во рерна и трае до седум минути. Кардиналите живеат во изолација и не можат да користат дури ни најосновни средства за комуникација. Храната ја јадат во заеднички простории, а дневниот ритам повеќе потсетува на манастир отколку на политичко собрание. Сепак, секој детал – од изборот на храна до должината на молитвата – има свое место во овој свет процес, објави српски Телеграф.