Skip to content
Бугарија останува цврсто на своите позиции во однос на евроинтегративниот процес на Македонија, откако шефицата на бугарската дипломатија, Велислава Петрова, порача дека фокусот на Скопје треба да биде насочен кон исполнување на обврските преземени кон Европската Унија, наместо кон отворање нови спорови со Софија.
Во изјава за Бугарската национална телевизија, Петрова нагласи дека за бугарската страна ова прашање повеќе не претставува билатерален спор, туку дел од односите меѓу Европската Унија и земја кандидат за членство. Таа повтори дека договорената рамка од 2022 година е составен дел од европскиот консензус и дека Софија нема намера да отстапи од принципите врз кои беше овозможено отворањето на пристапниот процес на Македонија, вклучително и обврската за уставни измени.
Според Петрова, Бугарија испраќа позитивни пораки, но од македонска страна не секогаш гледа доволна политичка зрелост за надминување на предизвиците. Таа оцени дека Македонија треба да го искористи актуелниот момент кога процесот на проширување повторно добива на интензитет, особено имајќи предвид дека Црна Гора и Албанија бележат побрз напредок во преговорите со Европската Унија.
Слични ставови бугарската дипломатија изнесе и по неодамнешната средба меѓу Петрова и министерот за надворешни работи, Тимчо Муцунски, во Шведска. Тогаш беше нагласено дека целосното спроведување на обврските преземени во рамките на европскиот договор од јули 2022 година претставува единствена основа за натамошен напредок на Македонија кон членство во Унијата.
Во меѓувреме, бугарските медиуми продолжуваат да пренесуваат дека заштитата на правата на граѓаните со бугарска самосвест во Македонија останува еден од клучните приоритети на Софија. Таквите пораки дополнително потврдуваат дека бугарската страна и натаму инсистира на уставните измени како предуслов за продолжување на процесот.
Од македонска страна, премиерот Христијан Мицкоски останува на ставот дека нема да има отстапки кога станува збор за македонскиот идентитет, јазик, култура и историски особености. Министерот Муцунски, пак, по средбата со Петрова, истакна дека овие прашања не можат да бидат предмет на преговори или условувања.
Така, и покрај дипломатските контакти, позициите на двете држави остануваат непроменети. Додека Софија инсистира дека станува збор за европски обврски што Македонија треба да ги исполни, Скопје смета дека условите имаат билатерална димензија и не смеат да навлегуваат во идентитетските прашања.
Во пресрет на посетата на претседателот на Европскиот совет, Антонио Кошта, на Македонија, повторно се отвора прашањето дали Европската Унија ќе успее да пронајде механизам за деблокирање на процесот или земјата и натаму ќе остане соочена со истите пречки на патот кон членството, објави Скопје1.мк
