Баерн сигурен против Арсенал, Атлетико се провлече во Милано

Европскиот првак Баерн Минхен со голема предност од 2:0 го заврши првиот дуел од осминафиналната пресметка во Лигата на шампионите со Арсенал, додека Атлетико Мадрид минимално со 1:0 го совлада Милан.

Стрелци за Баварците синоќа на „Емирати“ во Лондон беа Тони Крос во 54.минутаа и Томас Милер во 88.минута.

Арсенал од 37.минута играше со фудбалер помалку, откако црвен картон доби голманот Војчех Шчесни. Домашниот голман направи прекршок за пенал над осамениот Арјен Робен и беше исклучен, а во продолжение од натпреварот ударот од 11.метри Давид Алаба не успеа да го реализира.

Пенал не беше реализиран и на спротивната страна во 8.минута кога Месут Озил пропушти можност да го доведе Арсенал во водство.

На „Сан Сиро“ во Милано домаќините беа подобриот тим во две третини од натпреварот, два пати ја погодија и рамките на голот, имаа уште неколку шанси, но не успеаја да реализираат. Пропуштените шанси на Кака и Поли, Атлетико ги казни во 83.минута кога по една грешка на одбраната на Милан погоди Диего Кошта.

Во вторникот играа: Манчестер Сити – Барселона 0:2 и Баер Леверкузен – ПСЖ 0:4.

На 25 и 26 февруари ќе се одиграат првите дуели од преостанатите четири осминафинални пресметки: Зенит – Борусија Дортмунд, Олимпијакос – Манчестер Јунајтед, Галатасарај – Челзи и Шалке – Реал Мадрид.