Skip to content
Копретседателот на „Вреди“ и градоначалник на општина Чаир, Изет Меџити, денеска во изјава за медиумите истакна дека со премиерот Христијан Мицкоски уште не разговарале за деталите и за ресорите што ќе бидат опфатени со најавената реконструкција, која се очекува да биде во јуни.
– Со премиерот, со владиниот партнер, само начелно разговаравме и договоривме дека ќе има реконструкција. Но, треба да седнеме да разговараме за принципите, за ресорите и другите прашања. За тоа не сме разговарале досега во детали – рече Меџити по отворањето на затворениот базен во населбата Топанско Поле.
Тој ги повика пратениците Албанци да го поддржуваат законот за правична застапеност, кој е во собраниска процедура. Информира дека функционерите што ќе го прекршат законот, ќе може да се санкционираат и со оставка од политичката функција. Меџити се осврна и на забелешките на Зијадин Села за законот за правична застапеност.
– И јас и г. Села имавме многу можности во минатото, но не донесовме одлука, не донесовме закон за соодветна застапеност. Да седиш настрана и да изразуваш желби е лесно. Кога си Влада, мора да преговараш со владините партнери, да наметнеш решенија. И што е важно, по 25 години, првпат ова прашање ќе биде решено со закон – закон за соодветна застапеност на Албанците во државната и јавната администрација и првпат со ова прашање нема да се занимаваат министерствата и дирекциите, туку Владата, координативното тело, кое ќе го предводи првиот заменик-премиер. По донесувањето на законот, секое службено лице што ќе го прекрши законот нема да ги наруши балансерот и конкурсот, туку ќе го прекрши законот и може дури и да биде санкционирано со оставка од политичка позиција – потенцира Меџити.
За решавање на прашањето со правосудниот испит, Меџити посочи дека таму корекциите што треба да се извршат се мали и не очекува ова прашање да се одолжува.
– По 30 години, се решава проблемот за правосудниот испит. Тие (студентите Албанци) ќе може тоа да го полагаат на албански јазик, како што и студираат, и логично беше и правосудниот испит да го полагаат на албански јазик, како што ќе се решаваат и други професионални испити. Ги поздравувам студентите. Мислам дека ова е заедничка победа и треба да славиме. Нема потреба за протести. Нема причина и потреба да протестираат. Заедно треба да прославиме за победата дека по 25 години, ќе може правосудниот испит да го полагаат на албански јазик – рече Меџити.
МИА
