Skip to content
Лубеницата може да биде многу корисна храна за време на бременоста, бидејќи е слатка, лесно сварлива, хидрирачка и добар извор на фитонутриенти.
Колку е безбедно да се јаде лубеница секој ден?
Новинарката Шарлот Хилтон Андерсен објави за „The Healthy“ што ѝ се случило кога јадела лубеница секој ден една недела. Андерсен одлучила да јаде лубеница за време на бременоста и рекла дека се чувствувала хидрирано додека ја јадела.
Диететичарката Џесика Плауман нагласува дека јадењето лубеница секој ден е сосема во ред во повеќето случаи, но некои луѓе сепак треба да ја прескокнат.
„Важно е да се нагласи дека вашата исхрана треба да биде избалансирана, затоа погрижете се да јадете многу овошје и зеленчук секој ден. Ако јадете само лубеница, тоа би можело да доведе до некои проблеми“, истакнува Плауман.
Ако имате чести главоболки, би било мудро да јадете лубеница умерено, вели таа.
Всушност, лубеницата содржи значителна количина на тирамин, аминокиселина која влијае на крвниот притисок. Ова значи дека лубеницата може да игра улога во предизвикувањето на напади на мигрена.
Дијабетичарите исто така треба да внимаваат на содржината на шеќер во лубеницата. „Дијабетичарите или другите луѓе кои имаат тешкотии со регулирањето на шеќерот во крвта треба да ја намалат или избегнуваат лубеницата, бидејќи може да предизвика скок во шеќерот во крвта“, предупредува Плауман.
Лубеницата е исклучително хидрирачка
„Општо земено, бојата на овошјето може да биде индикатор за тоа колку хранливи материи има во него“, вели Плауман. „Црвената нијанса на лубеницата укажува на висока содржина на ликопен, природен каротеноид. Колку е подлабока и потемна бојата, толку подобро“, додава таа.
Лубеницата се состои од дури 92% вода, што ја прави исклучително хидрирачка. Андерсен истакна дека ова е главната придобивка од јадењето лубеница што ја забележала. Плауман истакнува дека лубеницата често се препорачува за деца кои се пребирливи во јадењето или за постари лица кои забораваат да пијат вода.
Експертите, исто така, забележале дека лубеницата може да дејствува како антиоксиданс, помагајќи му на телото да се ослободи од токсини како што е амонијакот.
Лубеницата може да помогне при воспалителни процеси
Бројни студии сугерираат дека многу современи болести произлегуваат од системско воспаление во телото, а фитонутриентите што се наоѓаат во овошјето се меѓу најдобрите оружја што ги имаме против нив.
Лубеницата е богата со ликопен, витамини А и Ц, калиум, магнезиум и антиоксиданси, кои се хранливи материи кои се борат против воспалението.
Намалување на ризикот од срцеви заболувања
Лубеницата има повеќе ликопен од кое било друго свежо овошје или зеленчук. Ликопенот е моќен антиоксиданс за кој е докажано дека го намалува ризикот од некои видови на рак, срцеви заболувања и проблеми со очите.
Калиумот е важна хранлива материја за здравјето на срцевиот мускул, а внесувањето калиум, кој лубеницата го има во изобилство, може да го намали ризикот од срцеви заболувања. Андерсен истакнува дека никогаш немала проблеми со срцеви заболувања, но дека ова е уште една дополнителна придобивка од редовната консумација на лубеница.
Што се променило по една недела?
Шарлот Хилтон Андерсен забележала дека е подобро хидрирана. Тоа е ефект што можеме да го забележиме речиси веднаш. За жал, другите предности не можат да се видат „со голо око“. Сепак, редовното јадење лубеница може да го намали ризикот од срцеви заболувања и да го намали воспалението во телото. Овошјето содржи и супстанции кои го намалуваат ризикот на долг рок. Затоа е одлично да не се прескокнува лубеницата во текот на сезоната, пишува Крстарица.
