Skip to content
Европските сојузници го зголемуваат својот придонес со дополнителни сили кои можат да му бидат ставени на располагање на НАТО во случај на воена криза, а откако САД го намалија своето учество, изјави денеска генералниот секретар на Алијансата, Марк Руте.
Минатиот месец Вашингтон ги информираше сојузниците за одлуката да го намали обемот на американските воени капацитети и сили што би биле достапни во случај на криза.
Оваа одлука ги отвори прашањата за тоа како и кога европските држави ќе ги пополнат празнините кои ќе произлезат од намаленото американско учество.
Руте истакна дека европските членки веќе преземаат конкретни чекори за зголемување на сопствените капацитети и за обезбедување дополнителни сили што ќе можат брзо да се активираат доколку има потреба од тоа.
Неговата изјава доаѓа во пресрет на состанокот на министрите за одбрана на земјите членки на НАТО во Брисел, каде што една од главните теми ќе биде токму распределбата на одговорностите меѓу сојузниците и зајакнувањето на европските одбранбени капацитети.
МИА
