(ВИДЕО) Милиони бубамари го преплавија британскиот брег

Велика Британија се соочува со најголемата појава на бубамари од рекордно топлото лето во 1976 година. Според научниците, за ова се виновни топлотните бранови и невообичаено високите температури, особено во јужните и југоисточните краишта, каде милиони бубамари го преплавија брегот поради изобилството на храна.

Најмногу беше погодена плажата во селото Поинт Клер, во грофовијата Есекс, каде мештаните беа затекнати од настанот. „Имаше бубамари насекаде“, изјавил еден жител. „Една ми слета на лицето, а другите на моите кучиња.“

Минатиот четврток, рој бубамари дури го прекина и натпреварот во крикет меѓу Англија и Индија на стадионот „Лордс“ во Лондон. Заменик-капетанот на англиската репрезентација, Оли Поуп, по натпреварот рече: „Никогаш не сум доживеал нешто вакво.“

Д-р Хелен Рој, еколог и водечка британска стручњачка за бубамари, вели дека оваа година има исклучително голем број на видови што се хранат со лисни вошки, како седмоточкестата бубамара. „Тоа е резултат на големото присуство на вошки и топлото време“, објаснува таа и додава дека граѓаните пријавуваат бројни случаи преку платформата iRecord, дел од проектот UK Ladybird Survey.

Научниците ги повикуваат луѓето да поставуваат плитки садови со вода во дворовите за да им помогнат на инсектите и дивите животни во топлите денови. Исто така, ги охрабруваат да не ги отстрануваат вошките од растенијата, бидејќи тие се храна за бубамарите.

Професорот по зоологија Тим Колсон од Универзитетот Оксфорд ги споредува бубамарите со волците: „Како што волците ја регулираат популацијата на елени, така бубамарите ја контролираат популацијата на вошки, кои можат да предизвикаат сериозна штета на растенијата.“

извор: trn.mk