Се избира женски автомобил на годината: Кој е вашиот фаворит?

Минатата година „Пежо 308“ ја освои титулата Женски автомобил на годината, а овогодинешниот победник ќе биде објавен на 8 март, Меѓународниот ден на жената.

Членовите на жирито за женски автомобил на годината започнаа со гласањето. Во првиот круг, 60 автомобилски новинарки од 44 земји во светот избираат меѓу 59-те кандидати за автомобили за наградата што секоја година ја доделува ова здружение на новинарки.

Прво, тие ќе ги одберат победниците во шест различни категории: градски автомобил, семеен автомобил, голем седан, голем теренец, спортски автомобил и пикап. Автомобилите што ќе постигнат највисока оценка во секоја од категориите одат во следната фаза на гласање, по што ќе се избере најдобриот женски автомобил во светот во 2023 година.

Победниците во секоја категорија ќе бидат објавени на 15 февруари, а единствениот победник ќе биде објавен на 8 март, Меѓународниот ден на жената.

Целта на оваа единствена награда е да се препознаат најдобрите автомобили на годината и да се даде глас на жените во автомобилскиот свет.

Критериумите за гласање се засноваат на истите принципи кои го водат секој возач при купувањето возило.

Аспектите како што се безбедноста, квалитетот, цената, дизајнот, леснотијата на возење и влијанието врз животната средина, меѓу другото, се фактори што жирито ги зема предвид при гласањето.