Откриени 50 жртви на трговија со луѓе во Црна Гора, меѓу кои 36 малолетници

Обвинителствата во Црна Гора минатата година регистрирале вкупно 50 жртви на трговија со луѓе, вклучувајќи 36 малолетници – 18 момчиња и 18 девојчиња, според нацрт-извештајот на Владата на Црна Гора доставен до Обединетите нации.
Во Нацрт-вториот периодичен извештај до Комитетот на ОН за економски, социјални и културни права се наведува дека меѓу жртвите биле 26 мажи и 24 жени.

Во текот на 2025 година, покренати се голем број постапки против лица вклучени во трговија со луѓе. Отворени се 27 случаи против 32 физички и три правни лица, издадени се 20 истражни налози против 23 физички лица, а поднесени се 21 обвинение против вкупно 25 физички лица.

Според извештајот, најчестата форма на експлоатација останува принудното просење, со 28 идентификувани жртви. Регистрирани се и 10 случаи на трудова експлоатација, четири сексуална експлоатација и еден случај на принуден брак.