Skip to content
Претставничката на ЕУ за надворешна политика и безбедност, Каја Калас, во пресрет на состанокот на министрите за надворешни работи на ЕУ во Брисел, објави дека уште 250 лица и субјекти ќе бидат вклучени во рускиот режим на санкции. Калас: ЕУ санкционира уште 250 лица и субјекти поврзани со Русија
Таа на мрежата Икс изјави дека одлуката ќе биде донесена со 21-от пакет санкции.
„Ова е нашата најголема рунда индивидуални санкции од руската инвазија во 2022 година и го вклучува најголемиот пакет кибер санкции на ЕУ досега“, напиша Калас во објавата.
Таа додаде дека главната цел на новите санкции е финансискиот столб на воените капацитети на Русија.
Европската унија воведе санкции врз руски воени разузнавачи, хакери и приватни компании поради долгогодишната кампања на кибер шпионажа.
На списокот на санкции од ЕУ се девет лица и четири субјекти обвинети за врски со онлајн шпионска мрежа која ЕУ ја смета за одговорна за саботирање на критична инфраструктура како што се топлификациските и електраните од 2010 година.
ЕУ посебно го нападна 16-от центар на Руската Федерална служба за безбедност, за кој се наведува дека „следи различни групи за кибер-закани“ и „спроведува широк спектар на сè посериозни злонамерни кибер-активности“.
Европскиот совет во соопштението наведува дека тие дејствија „придонеле кон напорите на Русија да ја дестабилизира ЕУ, нејзините земји-членки и меѓународните партнери“.
Имињата на поединци и субјекти, кои обично вклучуваат компании, владини агенции, банки или други организации, не се наведени.
Францускиот министер за надворешни работи Жан-Ноел Баро изјави дека Франција има намера да го повика рускиот амбасадор во наредните денови за да даде објаснување.
Тој изјави за француската телевизија BFM дека целта на кибер-активноста била „да се соберат информации или да се изврши саботажа“.
Баро ја наведе саботажата на железничката инфраструктура како пример, додавајќи дека тоа било случај во Полска.
Некои земји ја обвинија Русија за користење на кибер напади и пропаганда за мешање во изборите.
Шведска во средата соопшти дека проруска група со врски со руските безбедносни и разузнавачки служби стои зад кибер нападот врз топланата минатата година.
Објавата следеше по предупредувањата од официјални лица во Полска, Норвешка, Данска и Латвија дека Русија напаѓа критична инфраструктура низ цела Европа.
МИА
