Џенифер Анистон се омажи во тајност

Џенифер Анистон тајно се венчала со својот свршеник Џастин Теру, објавија сите светски медиуми. Свадбата се одржала во вилата вредна 22 милиони долари во Бел Ер, каде што двојката и живее, а објавија и фотографии на кои се гледа испораката на тортата во вилата.

На свадбата, која се одржала во средата, биле поканети само најблиските пријатели, меѓу кои и голем број познати личности, како Хауард Стерн, Елен Деџенерис, Челзи Хендлер и Лиза Кудроу.

Судбоносното „да“ Џенифер и Џастин го кажале три години по свршувачката и неколку дена пред неговиот роденден, па наводно пријателите и семејството ги поканиле на роденденска забава и никој не знаел дека, всушност, доаѓа на свадба.

Медиумите безброј пати пишуваа дека тие двајца се венчале, но секој пат беше утврдено дека не е вистина.

Овој пат се чини дека тоа навистина се случило, а двојката засега не дала официјална изјава за медиумите.

Џенифер и Џастин се запознале за време на снимањето на комедијата „Тропски гром“ во 2008 година, но врската ја почнале три години подоцна. Ова е втор брак за 46-годишната актерка, која се разведе од Бред Пит во 2005 година.