Кошмар за возачите – премногу силни светла стануваат сериозен безбедносен проблем

Сè повеќе автомобили имаат LED светла, кои за многу луѓе се толку силни што им сметаат додека возат.

Зимската сезона носи повеќе часови возење во ноќни услови, а тука е и лошото време кое вклучува дожд, магла и снег, или услови на намалена видливост.

Истражувањето спроведено од водечката шведска компанија за инспекција на возила Bilprovningen покажува дека осум од 10 возачи се заслепени од светлата на возилата што доаѓаат од спротивната насока, објавува HAK Review.

Од нешто повеќе од еден милион патнички автомобили кои ги прегледале во 2022 година, секој четврти имал недостатоци во неусогласени или неисправни светла.

Сè повеќе автомобили имаат и LED светла, кои многу луѓе може да ги доживеат како премногу блескави. Покрај тоа, многу нови модели на автомобили имаат автоматски долги светла кои не се намалуваат на време.

Друга причина е што многу возачи имаат послаб ноќен вид како што стареат, а седум од 10 возачи признале во анкета дека нивниот вид е полош кога возат ноќе.

Тоа е уште една причина да го проверите видот, особено по 45-годишна возраст.

Исто така, се препорачува за време на магла, да бидат вклучени кратки светла или светла за магла, или двата вида светла на возилото.