МААЕ: Иранскиот реактор Хондаб е сериозно оштетен, повеќе не е во функција

Истражувачкиот реактор Хондаб во Иран е тешко оштетен од нападите и повеќе не е во функција, соопшти Меѓународната агенција за атомска енергија (МААЕ) доцна синоќа.

„Врз основа на независна анализа на сателитски снимки и сознанија за инсталацијата, МААЕ потврди дека фабриката за производство на тешка вода во Хондаб, за која Иран објави дека била нападната на 27 март, претрпела сериозни оштетувања и повеќе не е во функција“, соопшти агенцијата на „X“.

„Инсталацијата не содржи деклариран нуклеарен материјал“, додаде таа.

Реакторот во близина на градот Арак беше погоден минатиот јуни кога Израел и САД нападнаа ирански нуклеарни објекти. Во тоа време, МААЕ соопшти дека градежните работи се уште се во тек и дека, следствено, таму не е присутен нуклеарен материјал.

Израелската војска го потврди нападот во петокот, наведувајќи ги повторените обиди на Иран да го обнови објектот по минатогодишните напади. 

МИА