Новата Клеопатра ќе биде Зендаја

Најавено е снимањето на новиот филм „Клеопатра“ за легендарната египетска кралица и потврдено е дека Зендаја ќе ја игра главната улога.

Денис Вилнев, режисерот на филмот „Дина“ веќе се подготвува за својот следен голем проект. Филмот во кој студиото Sony Pictures ќе ја претстави Зендаја во улогата на египетската кралица ветува дека ќе биде исклучително значаен во светот на кинематографијата, а критичарите шпекулираат дека ова ќе биде највпечатливата и секако најкоментираната улога на младата актерка и дека тоа би можело да и донесе вредни награди.

Изборот на Зендаја за оваа голема улога предизвика големо внимание во Холивуд. Покрај позитивните коментари, веста проследена и со контроверзии предизвикани од реакциите на корисниците на социјалните мрежи, кои нејзината интерпретација на ликот на Клеопатра ја нарекуваат „црно перење“.

Според информациите што ги сподели познатиот инсајдер Даниел Ричман, Вилнев му ја доделил улогата на Октавијан на Тимоти Шаламе, додека се разгледува можноста Даниел Крег да го толкува ликот на Цезар.

Сценариото за филмот ќе го потпише Дејвид Скарпа, кој навестува дека заплетот на филмот повеќе ќе личи на возбудлив политички трилер отколку на класична историска приказна.

Со најавите дека снимањето ќе започне оваа година, се очекува „Клеопатра“ да се појави на големото платно до 2026 година, во зависност од распоредот на снимање.