Skip to content
Поминаа 13 години откако принцот Вилијам и Кејт Мидлтон се венчаа, што предизвика големо внимание ширум светот. Нивната венчавка на 29 април 2011 година беше еден од најважните настани во тоа време, а посебно се истакна венчаницата на Кејт. Принцезата од Велс се одлучи за бела тоалета со V-израз и долги чипкани ракави, креирана според нејзините желби да комбинира традиционални и современи детали. Венчаницата ја дизајнираше Сара Бартон од модната куќа Александар Меквин.
– Мис Мидлтон сакаше нејзиниот фустан да ги комбинира традицијата и модерното време со уметничката визија што го карактеризира делото на Александар Меквин – соопштија од Палатата.
Кејт не сакала ниту принцот Вилијам да дознае каква е венчаницата, па фустанот бил строго чуван, како од него, така и од сите радознали погледи. Креаторите на венчаницата морале да работат во целосна тајност. Просторијата во која се шиел фустанот била строго заштитена. Чистачите не смееле да влезат додека траело шиењето, редовно се менувала шифрата за влез во просторијата. Сите што работеле на шиење на фустанот морале да ги мијат рацете на секој половина час, а на секои три часа се менувале иглите, за да се осигура ткаенината да остане „недопрена“, пишува srecna.republika.rs.
Викторијанскиот стил како инспирација се огледува во корсетот кој според таа традиција се стеснувал на половината и бил поставено нешто под средниот дел. Овој стил е исто така белег на работата на Меквин. Фустанот се закопчувал одзади со 58 копчиња покриени со органза кои се закопчувале со панделки во традиционален дух.
Венчаницата била украсена со рачно изработена тантела, вклучувајќи мотиви од роза, трн, нарцис и детелина, кои ги симболизираат Англија, Шкотска, Велс и Северна Ирска кои ја сочинуваат Велика Британија. Фустанот имаше импресивен вел долг 2,7 метри, што дополнително го дополнил нејзиниот драматичен изглед. Апликациите од тантела на здолништето и корсетот биле рачно изработени во Кралското училиште за рачни работи користејќи ја техниката „Carrickmacross“, која потекнува од Ирска во 1820-тите. Рачно везените детали од тантела се индивидуално креирани и додадени на свилениот вел во боја на слонова коска. Единствениот користен материјал кој не е од британска компанија бил обрачот на потсукњата и горниот дел изработен од француска чипка Шантили.
Принцезата носеше и бидермаер со симболични цвеќиња како ѓурѓевак, зумбул, бршлен и мирта. Традицијата кралската невеста да носи мирта во нејзиниот свадбен букет датира од ерата на кралицата Викторија.
