Победа на Македонија над Црна Гора

Ракометната репрезентација на Македонија оствари победа на првиот од двата контролни натпревари што ќе ги игра во Скопје. Вечерва во „СРЦ Кале“ беше совладана репрезентацијата на Црна Гора со 33:27 (17:16).

Нашата репрезентација во „грч“ го почна дуелот со Црна Гора, која до 27.минута имаше постојано водство, а највисокото беше +3 (11:8). По тајм аутот на македонскиот селектор Ивица Обрван, нашите репрезентативци направија серија од 3:0 за изедначување. Македонија првпат поведе во 27 минута (15:14) кога ја искористи предноста од два играча повеќе на теренот.

Во вториот дел Македонија го имаше водството, а највисоката предност беше во 55.минута – 32:25. Селекторот Обрван им даде шанса на голем дел од играчите, а на клупата останаа само Никола Маркоски и Немања Прибак, додека поради повреда на коленото натпреварот го пропушти Дејан Пецаковски.

Кирил Лазаров со девет голови кај Македонија беше најефикасен, а ист број голови постигна и Васко Шеваљевиќ од Црна Гора.

Македонија во недела ќе игра против Србија, а утре играат Црна Гора и Србија.