Сообраќајка во Струга, четири лица повредени

Четири лица се здобија со телесни повреди во сообраќајна незгода што се случи синоќа на влезот во Струга, во близина на Мороишки Мост и бензиската пумпа на „Окта“, пренесе МИА.

Несреќата се случила околу 21 часот и 30 минути кога од засега непознати причини се судриле две патнички возила. Повредените биле хоспитализирани во Општата болница во Струга.

Според дежурниот лекар-хирург, доктор Владо Кочоски, здравствена состојба на повредените е стабилна и тие се пуштени на домашно лекување.

– Четворицата патници од едното возило, родители и нивните две ќерки имаа телесни повреди, а патничката од другото возило беше донесена со претрпен психички стрес. Сите се во добра здравствена состојба и се пуштени на домашно лекување, информира доктор Кочоски.

Секторот за внатрешни работи Охрид работи на утврдување на причините поради кои настанала сообраќајната незгода.