Канадската полиција ги отстранува демонстрантите од границата со САД

Канадската полиција денеска почна да ги отстранува демонстрантите од мостот Амбасадор, што е лоциран на границата помеѓу Канада и САД.

Демонстрантите шести ден го блокираат мостот Амбасадор поради епидемиолошките мерки воведени поради Ковид-19. Мостот Амбасадор е еден од најфреквентните гранични премини, а поради неговата блокада прекината е трговијата помеѓу Канада и САД.

Судот во Онтарио вчера нареди деблокирање на сообраќајот на копнената граница меѓу САД и Канада. Преку мостот Амбасадор секој ден минуваат околу 40.000 луѓе и се превезува стока во вредност од 323 милиони долари. Петнаесет камиони и автомобили го блокираат сообраќајот во двата правци, а со тоа и синџирите за снабдување на автомобилската индустрија во Детроит.

Во Канада веќе трета недела се одржуваат демонстрации против строгите епидемиолошки мерки и против задолжителната вакцинација против Ковид-19. Протести под мотото Конвојот на слободата беа иницирани од возачи на камиони во главниот град Отава кои се противат на правилото за задолжителен карантин или вакцинација за преминување на границата. 

MИА