Страшен случај на трговија со луѓе: Во куќа во Брчко затворени 31 дете

Полицијата уапси уште неколку лица поврзани со трговија со деца, откако во куќа во Брчко биле пронајдени 31 малолетно дете. Нивниот идентитет моментално се утврдува, а некои од нив имале и хрватски документи, од кои на голем дел им е истечен рокот.

Уште пет лица се уапсени под сомнение дека учествувале во трговија со деца, откако во куќа во градот Ивичи, во близина на Брчко во Босна и Херцеговина, биле пронајдени 31 дете на возраст до 12 години. Најмалото дете имало само неколку месеци.

Претходно веќе беа уапсени три лица од Брчко, откако полицијата упаднала во куќата и пронашла деца кои наводно имале хрватски пасоши. Децата ги чувала жена, најверојатно италијанска државјанка. Меѓу уапсените има и службеник на правосудната полиција и неговата мајка.

Планот на криминалната група за децата кои ги чувале во куќата е предмет на истрага, а грижата за нив ја презел Центарот за социјална работа.

„Истрагата е во тек и во наредните часови и денови ќе се знаат повеќе детали – дали осомничените имале помагачи и како е развиена мрежата. Исто така, ќе се утврдува идентитетот на децата“, изјавил извор за Блиц.

Како е откриен хоророт во Брчко?

Во меѓувреме, откриени се нови детали за случајот кој го потресе регионот. Според неофицијални информации, случајот бил откриен кога 12-годишно девојче, кое исто така живеело во куќата, излегло на улица во придружба на две деца. Како што пишува Блиц кај себе го имала пасошот.

„Таа му се приближила на првиот минувач на кој наишла и побарала помош. Луѓето веднаш го известиле Центарот за социјална работа и полицијата бидејќи девојчето не сакало да се врати во куќата, по што бил откриен ужасот“, изјавил добро информиран извор од истрагата. Тој додаде дека полицијата набрзо упаднала во куќата и ги пронашла децата – некои спиеле во креветчиња, а други седеле на мебелот.

Наводно, некои родители доброволно ги дале своите деца на чување во куќата во Брчко. За таа услуга наводно на уапсените им давале одреден паричен надоместок.

Меѓу пронајдените деца има дури повеќе девојчиња отколку момчиња“, додава изворот на Блиц.

Меѓутоа, според извори на „Република“, 12-годишното девојче, благодарение на кое била разоткриена целата приказна, не запрела случаен минувач на улицата, туку тропнала на вратата од една куќа која барала место да преспие. Човекот ја примил, а утрото повикал полиција. Набрзо полицијата во соработка со Центарот за социјална работа ја откриле куќата на ужасот.