Фицо: Планот на ЕУ за конфискација на рускиот имот може да доживее фијаско

Планот на Европската унија да го искористи рускиот имот за помош на Украина може да пропадне, бидејќи со себе носи сериозни ризици, изјави словачкиот премиер Роберт Фицо.

– Очекувањата од конфискацијата на замрзнатиот руски имот се огромни, но на следниот Европски совет во декември, кога треба да биде донесена одлука, Унијата може да се соочи со реалноста и планот може да доживее фијаско, истакна Фицо во видео-обраќање објавено на социјалните мрежи.

Словачкиот премиер предложи во заклучокот од самитот на Европската унија во четвртокот да не се споменува можноста за конфискација и Комисијата да предложи други можности за финансирање на Украина за наредните две години и додаде дека предлогот бил усвоен.

Тој предупреди дека предложената конфискација на рускиот имот претставува сериозни ризици, меѓу кои се можни реципрочни мерки од Русија, кршење на меѓународното право и покренување правни постапки од руска страна.

– Ова парче руско сирење е многу примамливо за европските врани, забележа Роберт Фицо. 

МИА