Уапсен осомничениот за обид за убиство и предизвикување општа опасност пред Собранието

Министерството за внатрешни работи на Србија соопшти дека денес е уапсен маж (70) кој влегол во еден од шаторите во близина на српскиот Парламент и испукал неколку куршуми кон едно лице (57), повредувајќи го во пределот на ногата. Министерството за внатрешни работи во соопштението наведува дека, поради сомнение дека сторил кривични дела обид за убиство, недозволено поседување, носење и тргување со оружје и експлозивни материи и предизвикување општа опасност, тој е задржан до 48 часа и дека ќе биде приведен во Обвинителството со кривична пријава.
Во соопштението се вели дека околу 10:16 часот наутро, В. А., кој не бил учесник на собирот пред Народното собрание, пукал. Се додава и дека В.А „потоа намерно предизвикал пожар во шаторот, при што експлодирала мала плинска боца“. МУП изјави дека повредениот М.Б. бил згрижен во Ургентниот центар, дека полицијата брзо го совладала и уапсила В.А., и дека пожарот бил локализиран и изгаснат.
„Во запалениот шатор немало оружје или муниција, освен оружјето и муницијата што ги донел осомничениот“, се вели во соопштението.
МУП изјави дека В.А. под сомнение за сторени кривични дела обид за убиство, недозволено поседување, носење и тргување со оружје и експлозивни материи и предизвикување општа опасност, ќе биде задржан до 48 часа и ќе биде приведен во Обвинителството со кривична пријава. Полицијата продолжува со интензивна работа за расветлување на сите факти и околности на овој настан, се додава во соопштението.