Skip to content
По жестоките критики во изминатиот период администрацијата на американскиот претседател Доналд Трамп се откажа од плановите за формирање на контроверзниот фонд за компензација за наводните жртви на правосудниот систем, јавува ДПА.
„Не продолжуваме со фондот“, им рече вчера вршителот на должноста државен обвинител Тод Бланш на американските конгресмени.
Трамп се соочи со остри критики во врска со фондот за компензација, вклучително и од неговата Републиканска партија. Администрацијата сега се чини дека попушти под тој притисок.
Критичарите го опишаа планот како прикриен фонд за лојалистите на Трамп и за корупција. Гласањето за другите буџетски мерки во Конгресот беше одложено токму со обидот да се зголеми притисокот врз Трамп, јавува германската агенција.
Американското Министерство за правда (DoJ) претходниот месец соопшти дека 1,776 милијарди долари ќе бидат доделени на нов „Фонд против оружје“ наменет за компензација на наводните жртви на политички или идеолошки мотивирани дејствија од страна на американската Влада.
Критичарите стравуваа дека јавните средства би можеле да се користат за наградување на поддржувачите на Трамп кои учествуваа во нападот врз Капитол во 2021 година, со цел да се поништи неговиот изборен пораз во корист на Џо Бајден. Многу од обвинетите за време на претседателствувањето на Бајден подоцна беа помилувани од Трамп откако се врати на функцијата во 2025 година, потсетува ДПА.
Фондот беше резултат на спогодба меѓу Трамп и Министерството за правда: Во јануари, претседателот, дејствувајќи како приватно лице, ја тужеше владата, барајќи милијарди долари надомест.
Во тужбата беше обвинет поранешен вработен во Службата за внатрешни приходи (IRS) за неправилен пристап до даночни евиденции поврзани со Организацијата Трамп за време на првиот претседателски мандат на Трамп и нивно протекување до медиумите.
Министерството за правда соопшти дека канцеларијата на окружниот обвинител постигнала договор со Трамп за основање на фондот. За возврат, тужбата беше отфрлена, потсетува ДПА.
МИА
